بعيدا عن مهاترات المدونات.. العلاقة بين الرجل والمرأة في الواقع تكون هكذا...غالبا يعني..

كتبت Sara Hegazi على صفحتها على الفيس بوك

[post_ad] 

بتقوم تعمله كوبايه الشاي وهيا فرحانه ..بتقوم تعمل الأكل وتقف في مطبخ درجه حرارته بتوصل ل ٤٠ درجه والعرق بيشر منها وهيا مبسوطه ..

بتقوم من الفجر تصحي العيال وتحضرلهم السندويشات وتوديهم المدرسه وبعدين تصحيه عشان دوشه العيال

اما تقوله انا تعبانه ..بيروح يطلب أكل من بره من غير زمزءه وكلمتين في الجناب مالهمش لازمه

وبيروح معاها للدكتور بعد اما يجي من شغله مش بيقولها روحي اكشفي وخدي اختك معاكي

اما تقوله عاوزه ازور أهلي ...بيقولها انتي رايحه ..فين ؟!

طبعا مافيش مرواح لأهلك

وايدك فاضيه كده .. شوفي اخواتك عاوزين ايه ونفسهم في ايه وانا هروح اجيبه وخدي هديه لماتك وانتي رايحه

بتقعد تكنس وتمسح وتغسل وتطبق وتكوي الهدوم وتلمع الارضيات عشان ماعهمش يودوا هدومهم للمكوجي ولا يجيبوا واحده تساعدها

[post_ad]

بس اما ربنا فتحها عليه ..بقي بيجبلها اتنين مش واحده عشان يساعدوها بكل طاقتهم

صحيح هيا مابتشتغلش وماعندهاش كاريير ومافيش في حياتها غير بيتها وعيالها ..وهوه مهندس وماسك عمال تحت ايده قد كده بس اما يقع في مشكله بيأخد رأيها .. مابيقولهاش وانتي ايه اللي فاهمك في شغلي ولا دماغك صدت من كتر القعده في البيت

يوم أما يكون عازم اهله ..بتقف من الفجر عشان تحضر في العزومه وبتبقي رجليها مش شيلها . بس اما اهلها يجوا يزروها بيكون مبسوط ومرحب بيهم ويقعد يشيل ويحط في أكل وحلويات وفاكهه وعصير

صحيح الفلوس كلها معاه وهوه اللي بيصرف بس اما يروح يشتري حاجه لوالدته بيدلها اكتر وبيقولها اشتري اللي عاوزاه لوالدتك

مابيحبش يزعلها لان زعلها وحش اووي لأن ما بتتصلحش غير بدهب

صحيح طلب الدهب اللي جابهولها كذا مره اما بيبقي عاوز يسدد ديونه او داخل في شغلانه جديده ...صحيح كانت بتدهوله بنيه صافيه وقلب راضي ..بس اما ربنا فتح عليهم ...عوضه ليها اضعاف مضاعفه و كاتبلها جزء من املاكه باسمها

صحيح ساعات صوته بيعلي وبيزعق وبيشخط ..بس كانت بتسكت وتعدي اليوم واما يجي الوقت المناسب كانت بتتدهمله بردوه

أما دخلت المستشفي فجاءه واتحجزت هناك ..مارحش رمي العيال عند أمها ولا راح ودها لأهلها ...كان هوه اللي بيطبخ ويغسل وينزل يجيب العاب للعيال عشان مايحسسهمش بحاجه

وكان بيخبي دموعه من عياله اما يجيوه يسألوه ماما فين ؟!

اما عيالهم كبروا واتجوزا وكل واحد راح في حاله ..طلبت منه تشتغل بعد ٣٠ سنه قعده في البيت

ماقلهاش وانتي اللي فهمك في الشغل ولا انتي عمرك ماتعاملتي مع الناس وانتي هتفهمي ايه في الاداره ..بطيب خاطر ادلها مبني كان بناه وعرضه للبيع عشان تفتحه مشروع خاص بيها وتمسك ادارته

صحيح كان كل يوم بيجيله عروض للبيع من هنا ومن هنا وباسعار مغريه ..بس هوه كان بيجري يشوفلها موظفين ويعملها الاعلانات والدعايا ويحل مشكالها

صحيح ..ماكنش بيدخل دخل في الاول ..وكل يوم حد يعرض عليه يبيع بعروض مغريه ..بس صبر عليها وكان بيوصلها كل يوم عشان ماتقعدش في البيت وهيا زهقانه اما العيال كبروا

[post_ad]

بعد كل السنين ديه لسه بتروح الكوافير وبتعمل شعرها عشان لسه عاوزاه يشوفها جميله زي ماهيا وهوه لسه شايفها جميله رغم شعرها الابيض وجسمها اللي باظ

صحيح لسه بيتخانقوا ..وبيتناقروا عشان كل يوم يجيب حد عندها في البيت يعزمه و كل خناقتها انك ازاي ماتقولش قبلها بفتره عشان اعمل حسابي ..ممكن اكون مش عامله حسابي 

لاعمرها اتضايقت انه جايب معاه حد ولا عازم حد بس كل مشكلتها انه يقولها بس

بيصحوا بعض عشان يصلوا الفجر ويعملها حاجه سخنه ويجبهلها ويقعدوا يشربوها مع بعض بعد الفجر

صحيح الاتنين كبروا وعجزوا بس لسه بيطلب منها كوبايه الشاي وهيا لسه بتعملهاله

البيوت بتقوم بكده ..بالمشاكل والصعوبات اللي بيعدوا بيها بتثبت كل يوم أنهم عاوزين بعض ...ومتمسكين ببعض وبيحبوا بعض

مش بتقوم انت عليك ايه وانا عليا ايه ..؟

الست اما بتحس بالأمان مع الراجل بتبقي هاين عليها تضحي بعينها وعمرها عشانه مش تقوم تعمل كوبايه الشاي

بس اما تحس بالغدر والخيانه وقله القيمه بتبقي عاوزه تدخله جوه كوبايه الشاي وهوه سخن😂😂

ربنا يحفظهم و يديلهم الصحه وطوله العمر والسعاده

#أمي_وأبويا

#٣٧_عام_من_النكهه

#شاي_بنكهه_النعناع